ꊨ ꊭ
ꁱꊿ：ꀋꈑꃺꃼ
ꀘꊿ：ꐛꈩꒉꎄ
ꅐꅑꊨꊭ、ꁖꅑꎇꃀꌋꆀꃰꅑꃰꊿꐮꐊꒆ、ꐯꈽꐥ、ꐮꐊꑍꅀꑞꃅꑌꀋꐚ……
—ꅇꌐ
ꋍ
ꊨꊭꈌꏑꏜꆏꈌꐙꏜ
ꊨꊭꈛꁧꈌꌠꎭꄷꈨ
ꊨꊭꈁꎔꀕꌠꇇꒃꂦꁧꀕ
ꊨꊭꑓꁴꅐꌠꂿꀋꋻ
ꊨꊭꂽꅐꂽꄓꈨꀋꋻ
ꊨꊭꁱꂷꀞꄮꇬ
ꀘꂾꄯꒉꐒꄮꇬ
ꊨꊭꋙꊂꉄꄮꇬ
ꃰꊿꐰꇑꈐꉘꀆꐒꌤꃅꌤꄮꇬ
ꊨꊭꅪꎔꃀꑊꋌꀋꊧꃚꐛꅅꈨ
ꊨꊭꎼꃏꃅꌠꊿꋋꌂ
ꊨꊭꅉꄜꇁꌠꊿꋋꏦ
ꊨꊭꐰꇑꐛꌠꊿꋋꉂ
ꊨꊭꐴꍠꆼꁠꈢꌠꊿꋌꇷ
ꃰꊿꄡꇗꅉꀕꀊꉘꇇꇬꉌꊭꇑꇬꎷ
ꌩꏪꊨꊭꄄꍻꀕꅷꇁ
ꐩꋊꊨꊭꁉꆪꀕꅷꇁ
ꊨꊭꂾꃚꇶꍠꀕꅷꇁ
ꊨꊭꃺꑌꌦꃅꅏꄅꑌꊨꊭ
ꊨꊭꁮꐚꃅꈯꏨꆉꑌꊨꊭ
ꊨꊭꋙꍈꒉꄎꄻꀋꅐ
ꊨꊭꒌꈎꆟꑣꄻꀋꅐ
ꊨꊭꂷꅍꀋꒃꊨꊭꆀꀋꃅ
ꊨꊭꀋꃀꏿꄵꊨꊭꄐꅅꈨ
ꊨꊭꇓꄃꁴꍂꃅꐚꄓꅅꈨ
ꀿꌗꃀꌗꈧꌺꆪꌺꑌꊨꊭ
ꁮꏛꐙꎭꄂꐎꄄꆈꑌꊨꊭ
ꏂꀨꈐꏭꑊꋌꉱꃀꑌꊨꊭ
ꀄꂼꏂꊂꇱꃏꌊꒌꑌꊨꊭ
ꃅꈯꊨꊭꅔꇬꒉꅝꇀꀕꌦꀋꐚ
ꑍ
ꅐꅑꇢꉢꒉꌠꐮꀕꑌꀋꐚ
ꁖꅑꉼꃀꒉꌠꊿꈱꐮꊏꌬꀋꄿ
ꃰꅑꃰꊿꒉꌠꀋꑇꑌꀋꉆ
ꑍꆏꈧꌺꒉꏁꌬꀕ
ꌊꆏꆪꌺꒉꐍꐷꀕ
ꃬꏿꇫꇬꃬꊭꌺꁱꐭ
ꃬꏿꈿꀋꁮꆎꑾꃅꇬꀋꂅ
ꃅꈯꏷꌺꊨꊭꏿꀕꉫꑌꌬꀋꄿ
ꒉꃴꇓꐎꊨꊭꃀꆏꉫꑌꌬꀋꄿ
ꊨꊭꆼꏻꌠꂿꋺꊨꊭꇬꀺꌠꂿꀋꋻ
ꃅꃴꈭꏂꋍꂷꅏꀑꈎꆏꋍꊈꄚꈿꈎ
ꈭꏂꈜꐎꈜꅪꁨꇉꀕꑴꇬ
ꈭꏂꑵꉙꐩꋊꉐꌦꐍꈘꀕ
ꃅꃴꄡꇗꃴꇉꀕꇈꆈꉘꀕ
ꃄꅉꄡꇗꆈꃃꃆꇈꈥꇤꀕ
ꈭꃀꀉꎓꌺꑣꃅꈯꎬꑌꌬꀋꄿ
ꈭꍫꀕꉘꃄꐡꊖꑳꇰꏭꐛ
ꈭꌦꈭꌋꃅꆳꀊꆠꐛꏭꐛ
ꅪꎔꅩꃨꂃꂩꋍꈭꀕꀎꇎꑍꈭꀕꇈ
ꃬꈪꃬꏢꌕꈭꀕꑴꌦꅅꈨ
ꏨꆉꅐꅑꏨꆉꃰꎝꌺ
ꏬꑭꀗꊪꃅꃴꃄꅉꏣꎼꑞꈴꐺ
ꃰꊿꏬꃀꌺꀑꇬꀋꍔꑌꑭꇬꍔ
ꏨꆉꅏꊭꍹꐛꑓꋪꁮꑱꃵꑟꁈꀋꐥ
ꃅꈯꄀꇐꉌꃀꑊꋌꁯꆮꐊꄉꄁꃰꏿ
ꊨꊭꌺꇢꌺꉘꇉꇬꎭ
ꊨꊭꒉꌤꃅꈯꍑꒉꊰ
ꃅꉒꃅꄂꊨꊭꅏꊭꐛꑟꁈꀋꐥ
ꁦꀑꃰꐎꊨꊭꋚꑌꐛꑟꁈꀋꐥ
ꄯꒉꀊꐎꁱꂷꀉꆈꊨꊭꐳꐎꐲꆈꐛꑟꁈꀋꐥ
ꌕ
ꎺꑌꃱꇌꀘꂾꏂꀨꈐꏭꀀꃅꆈꌣꀕ
ꎸꅍꊨꊭꑍꇁꌋꀋꐥ
ꃅꃴꃄꅉꃶꃅꌱꋠꐺ
ꎺꑌꃱꇌꁰꒌꊿꑴꃰꑴꊨꊭꅏꊭꄀ
ꋧꃅꁱꒃꁱꇯꄮꇬꐩꋊꂾꈌꄄꍅꀕ
ꎺꑌꃱꇌꇉꎔꇈꃨꑌꐛꋺ
ꄯꒉꏂꀨꑌꐛꋺ
ꃅꃴꍑꈜꁨꇉꑌꇉꋺ
ꅉꄩꈛꌎꆈꋧꑌꋪꋺ
ꎺꑌꃱꇌꎺꏣꌦꆈꑌꇓꋺ
ꉐꆈꀉꐚꋌꃮꋍꃅꃮꇬꎷ
ꆀꃅꊿꆅꉌꃀꊿꆅꑌꇬꎷ
ꁦꀑꁡꇤꉐꆈꃅꇴꈍꇬꎷ
ꌿꉘꈬꁍꍍꅀꀋꍍꑌꀋꐚ
ꌞꃅꉐꆈꀉꁌꊂꌒꐛꅅꈨ
ꊨꊭꌋꆀꊨꊭꐮꉙꀋꌧꃲ
“ꉐꄜꄯꒉ”ꆲꏂꐊꄉꃅꇕꄹꊂꃰ
ꊨꊭꃅꄷꒈꂃꒊꆱꄓ
ꊨꊭꃪꍻꈑꂷꇬꊎꍻꇬꎷ
ꃘ…ꇆꊭꀕꃘ……ꃘ…ꇆꊭꀕꃘ
ꁦꀑꆅꏂꊨꊭꅏꀑꐔꄀꇵꆏꌒ
ꇓꈓꃺꒉꊨꊭꌦꋊꄐꆏꌒ
ꌩꏪꉐꇓꁠꊨꊭꂾꃚꄚꐊꉐꇓꁠ
ꊨꊭꀱꊨꊭꑐꍠꀠꅪꀕ
ꊨꊭꃷꅍꀉꏵꃅꉘꐞ
ꆪꍝꆼꏻꃬꂵꒊꅍꐛ
ꃬꂵꉪꀋꐥꀆꌺꃹ
ꃅꈯꏨꆉꃬꀮꑮꍯꐺ
ꅐꅑꎼꃏꁮꅉꌊꌋꏣꃅꏣ
ꁡꉐꅏꀑꉪꄉꊨꊭꏿꈌꐆꅅꈨ
ꇖ
ꇉꄩꇪꀮꀋꁮꇉꉱꄃ
ꀋꁮꇉꉱꐝꅉꎳꅉꑟ
ꇉꄩꇪꀮꂾꅉꍃꅉꑟ
ꆺꑳꀉꂿꏦꁁꈥꇤꀕ
ꀉꄉꌺꐂꇬꇉꉘꅍꀕ
ꉩꇗꉨꃚꈐꏭꀉꁌꌀꄝꇂꀧꀕ
ꀉꑳꀿꏂꑓꂡꑓꊏꆗꁍꀕ
ꌀꄝꐈꇁꊨꊭꐛꑌꌬꀋꄿ
ꑓꂡꑓꊏꊨꊭꌷꄉꅐꍒꂪꍔꋺ
ꈬꉙꈬꃪꈬꌩꈬꇓꂾꃚꈂꀸꅑꅊꇈ
ꃪꑓꉌꇑꃪꐚꄴꅝꈧꐛꀕꀋꐚ
ꉌꇑꎸꆹꊿꌤꁬꋌꉬꑴꄷ
ꉌꇑꉌꆿꇬꌋꅜꅝꑌꀋꐚ
ꃅꃤꉌꇑꅏꊭꑳꈫꑳꊂꏶ
ꉌꇑꊨꊭꅀꎇꃀꉬꌠꂥꀋꀘꌦ
ꅔꐍꏰꌺꃅꃴꈁꄜꐋꀋꊌꏭꐛ
ꑲꅉꀉꐩꀆꄮꃰꊿꃅꉒꐰꃅꐰ
ꏰꌺꆀꌺꑊꀡꋌꇽꅑꑌꌬꀋꄿ
ꊫꏰꀋꃀꄓꐚꏽꄮꌺꇗꇬꑌꌬꀋꄿ
ꊫꏰꈋꈌꁮꏂꏿꀕꐯꇯꃸꑌꌬꀋꄿ
ꂷꑭꉑꀮꌀꎔꌩꏪꈬꊂꁨ
ꂸꃃꀱꋓꀕꆏꉐꎔꌺꇖꀱꋓꀕ
ꌀꎔꅑꄉꑮꒃꋑꋉ ꑻꈭꀕ
ꌀꎔꑣꌊꃷꄉꅐꅑꌅꃀꐛꑟꉂ
ꋌꉈꈭꐨꉑꀮꉑꃀꐯꀋꏚꆘꅝ
ꅙꑭꎽꀮꅙꑭꍃꌠꐩꋊꌙꈈꀕ
ꎽꀮꎽꃀꉂꅇꑟꅇꁬꃷꈨꏭꐛ
ꎽꌺꑓꍝꃰꊿꈹꌌꑥꀱꋺꑌꌬꀋꄿ
ꎽꀿꎽꃀꏤꏅꋌꉜꏨꆉꐛꑌꌬꀋꄿ
ꎼꑓꏬꂿꏬꑓꎼꀋꂿꑌꌬꀋꄿ
ꉬ
ꌦꃬꌊꃬꀈꉙꐦꇬꃬꀮꄍꏸꐥ
ꀈꉙꐦꐛꃄꁕꇇꇤꐰꅊꇈ
ꃬꀮꊿꒃꃬꎶꊨꌐꄷꅅꈨ
ꃬꎶꁌꄓꊂꌒꃶꃅꃶꅅꈨ
ꃬꂵꀑꐯꃅꇕꄹꊂꍯꁧꄷꅅꈨ
ꇉꅶꈹꀮꋍꂷꈹꌌꐖꋠꑞꑌꁈꀋꐥ
ꆄꁮꈺꁘꈹꀮꎸꃚꇿꑌꌬꀋꄿ
ꀘꋊꃀꅉꈹꀮꐊꄉꐚꏷꏿꏭꐛ
ꄯꒉꎭꆱꁮꏂꇷꆴꈛꁧꎍ
ꇉꅶꂾꏒꀕꅉꑲꅉꀉꐩꀆꅅꈨ
ꀉꁌꑾꐊꉬꐮꉬꉎꏣꀕꌦꀋꐚ
ꈎꏅꌩꈉꀉꁌꑾꐊꌌꅐꄀ
ꃰꊿꐩꋊꑾꐊꎝ
ꁯꇈꌠꐯꀋꀥ
ꀉꁌꑾꐊꂾꃚꌠꑊꇰꋒꋑꃚꌡ
ꐧꈲꋧꃅꋌꌌꄄꍻꀕꇈꏾꁵꀕ
ꀊꆨꏃꃅꒊꊝꂋꄮꎿꋮꉘꃀꂷꌠꆹ
ꀆꌦꀆꌋꀆꑴꉢꉳꁦꌺꐛꄉꒉꄩꁮ
ꀆꀮꀆꃀꀆꌺꋌꉈꁦꏢꇈꏢꏹꅷꇁ
ꁧꑭꁡꇤꃰꊿꀆꌌꒌꀋꈎꀆꌌꃥꀋꆦ
ꄚꀆꌺꑬꏪꇓꈓꀊꏀꋌꐔꌊꐚꐺꌠꀄꂼ
ꀃꑍꋋꄮꏃꃅꐚꇉꑌꊨꊭ
ꋧꃅꎿꃀꎿꉱꏹꇉꑌꊨꊭ
ꈨꆨꁱꒃꌊꄉꊾꇷꐺꌠꑌꊨꊭ
ꀉꁌꂷꅍꏃꃅꇖꈌꋙꒌꐺꌠꑌꊨꊭ
ꃅꐛꃅꐙꁏꀋꆳꀱꑷꒃꐺꌠꑌꊨꊭ
ꐰꃅꀊꄙꉐꐰꃅꅇꀜꉅ
ꌞꅇꀀꅇꊨꀋꄅ
ꐰꃅꋍꍂꉌꌒꄀ
ꂸꂷꎍꀋꇮꂸꂷꆺꀕꂄ
ꐰꃅꃥꌊꑋꅉꇑꌠꋊꈙꇈ
2022ꈎ12ꆪ20ꑍꍰꄕ
